謝銘祐

老兮啊

作詞:謝銘祐 作曲:謝銘祐

若無將青春攏寄佇你遐 敢會較好命?ná bô tsiòng tshing-tshun lóng kià tī lí hiâ kám-ē khah hó-miā

囡仔也大漢 厝變旅社 你賰狗佮我gín-á iā tuā-hàn tshù piàn lú-siā lí tshun káu ka̍h guá

喙邊咬著薰 沙眯望窗外 飛去佗位啦?tshuì pîng kā-tio̍h hun sà bui bāng thang-guā pue-khì tó-uī là?

幸福是一軀穿久的衫 用生活補的彼領hīng-hok sī tsi̍t-su tshīng kú ê sann iōng sing-ua̍h póo ê hit niá

老兮啊! 暗頓欲食啥? 我有炕一坩滷肉láu ê ah! àm-tǹg beh tsia̍h siánn? guá ū khòng tsi̍t khann lóo-bah

食飽你著陪阮來公園行行咧tsia̍h-pá lí tio̍h puê gún lâi kong-hn̂g kiânn kiânn leh

順紲來去配你的目鏡sūn-suà lâi-khì phuè lí ê ba̍k-kiànn

老兮啊! 你目頭一結 毋免講我攏知影láu ê ah! lí ba̍k-thâu tsi̍t kat m̄-bián kóng guá lóng tsai-iánn

歡喜艱苦拖磨遮人生的債 當時會收煞?huann-hí kan-khóo thua buâ jia jîn-sing ê tsè tang sî ē siu-suah

你藥仔敢食矣?lí io̍h-á kám tsia̍h ah?

老兮啊! 你早起一直揣無的彼領獵裝, 我想起來矣!láu ê ah! lí tsái-khí it-ti̍t tshuē bô ê hit líng la̍h tsong, guá siūnn-khí-lâi ah!

四、五冬前咱細漢兮吵欲欲, 你著予伊矣!sù gōo tang tsiân lán sè-hàn ê tshá beh ti, lí tio̍h hōo i ah

看你揣徦氣怫怫, 敢若囡仔咧!khuànn lí tshuē ka khì-phut-phut kánn ná gín-á leh!

你最近的血壓小可較夯哦! 愛較注意一下,lí tsuè-kīn ê hueh-ap sió-khuá khah hang hioh, ài khah tsù-ì tsi̍t hā

莫予我不時佇你邊仔踅踅唸,mài hōo guá put-sî tī lí pinn-á se̍h se̍h liām

我是恁某, 毋是恁老母, 知無? 啊! 好來睏矣!guá sī lín bóo, m̄ sī lín lāu-bú, tsai bô! hó lâi khùn ah!

喙邊咬著薰 沙眯望窗外 飛去佗位啦?tshuì pîng kā-tio̍h hun sà bui bāng thang-guā pue-khì tó-uī là?

幸福是一軀穿久的衫 用生活補的彼領hīng-hok sī tsi̍t-su tshīng kú ê sann iōng sing-ua̍h póo ê hit niá

老兮啊! 暗頓欲食啥? 我有炕一坩滷肉láu ê ah! àm-tǹg beh tsia̍h siánn? guá ū khòng tsi̍t khann lóo-bah

食飽你著陪阮來公園行行咧tsia̍h-pá lí tio̍h puê gún lâi kong-hn̂g kiânn kiânn leh

順紲來去配你的目鏡sūn-suà lâi-khì phuè lí ê ba̍k-kiànn

老兮啊! 你目頭一結 毋免講我攏知影láu ê ah! lí ba̍k-thâu tsi̍t kat m̄-bián kóng guá lóng tsai-iánn

歡喜艱苦拖磨遮人生的債 當時會收煞?huann-hí kan-khóo thua buâ jia jîn-sing ê tsè tang sî ē siu-suah

你藥仔敢食矣?lí io̍h-á kám tsia̍h ah?

謝銘祐 的其他歌曲 · More by 謝銘祐

歌詞與台羅拼音出處 · Lyrics and Tâi-lô from 台客鬼 Tâi Kheh Kuí